Маълумки, 10 августдан бошлаб мамлакатимиздаги барча техникум ва коллежларда 2021-2022 ўқув йили учун ўқувчилар қабули бошланиши режалаштирилган. Ҳар галгидек, бу йилги қабул жараёнларини ҳам уюшқоқлик билан ўтказиш кўзда тутилмоқда.
Шу муносабат билан вилоят касбий таълимни ривожлантириш ва мувофиқлаштириш худудий бошқармаси ташаббуси билан Чортоқ Абу Али ибн Сино номидаги Жамоат саломатлиги техникумида 2021-2022 ўқув йили учун коллеж ва техникумларга қабул жараёни олдидан ўқув-амалий семинар ташкил этилди.
Семинарда вилоятдаги коллеж ва техникумларнинг директорлари ҳамда қабул бўйича масъул котиблар таклиф этилди.Меҳмонлар дастлаб жорий йилдаги қабул жараёнини ташкил этиш ҳамда уни ўтказиш мақсадида ташкил этилган “Маслаҳат маркази” ва “Колл центр” фаолияти билан таништирилди. Сўнгра техникум директори Гулнора Камалова семинар иштирокчиларига коллеж ва техникумларга ўқувчиларни қабул қилиш бўйича махсус яратилган электрон платформа орқали ҳужжатларни топшириш ва қабул қилиш бўйича тушунча бериб ўтди. Бундан ташқари, иштирокчилар техникумда ташкил этилган инновацион ўқув амалий хоналар билан ҳам танишдилар.
Семинар сўнгида ўтказилган умумий йиғилишда иштирокчилар қабул жараёнини ташкил этиш бўйича ўз фикр-мулоҳаза ва таклифларини билан ўртоқлашдилар.Якунда бошқарма бошлиғи Б.Тожиматов бугунги кунда коллеж ва техникумлар раҳбарлари олдида турган вазифаларни белгилаб берди.