Пиллачилик қишлоқ хўжалигининг муҳим тармоқларидан саналади. Чортоқ туманида бу борада жадал ишлар амалга оширилмоқда. Учинчи мавсум учун 305 қути ипак қурти уруғи жонлантирилиб, 500 дан ортиқ хонадонга тарқатилган. Ҳар қутидан 40 килограмдан жами 12 тоннадан зиёд пилла хомашёси олиш режалаштирилган бўлиб, ҳозиргача кўзланган марранинг қарийб 50 фоизи бажарилди. Пилланинг ҳар бир килограми учун 25000 сўмдан тўланаётгани ҳосилдорлик омили бўлмоқда.
Тумандаги “Соф ипак инвест” масъулияти чекланган жамияти вилоятимиздаги йирик пиллачилик корхоналаридан бири бўлиб, бу ерда пилла етиштиришда ўзига хос мактаб яратилган. Вилоят пиллакорлари ва соҳа мутахассислари учун айнан шу ерда амалий семинар ташкил этилиши ҳам бежиз эмас.
Семинарда пиллани қайта ишлаш корхоналари, “Агропилла” раҳбарлари, тутзорлар эгалари, касаначиларга тут плантацияларини ташкил этиш, тут новдаларига шикаст етказмаган ҳолда инновацион усулда ипак қуртини такрорий боқиш, турли касалликлар ва зараркунандаларга қарши курашиш усуллари амалий тарзда кўрсатилиб, ипак қурти парваришлашнинг илғор агротехникаси бўйича тавсиялар берилди.